မာရီစကာကို အချိန်ပေးမည်ဆိုလျှင် ချယ်လ်ဆီးအသင်း ယခင်အောင်မြင်မှုများ ပြန်လည်ရရှိနိုင်မည်ဟု မာကီလီလီပြော

ချယ်လ်ဆီးအသင်း၏ ကွင်းလယ်ကစားသမားဟောင်း ကလော့ဒ် မာကီလီလီက အသင်း၏ နည်းပြသစ်ဖြစ်သူ အန်ဇို မာရီစကာကို အောင်မြင်မှုရရှိရန် လိုအပ်သောအချိန်နှင့် ယုံကြည်မှုကို ပေးအပ်ပါက စတန်းဖို့ဒ်ဘရစ်ခ်ျသို့ အောင်မြင်သောနေ့ရက်များ ပြန်လည်ရောက်ရှိလာမည်ဟု ယုံကြည်ကြောင်း ပြောကြားလိုက်သည်။

ချယ်လ်ဆီးအသင်းသည် တော့ဒ် ဘိုလီဦးဆောင်သော အုပ်စုက ကလပ်ကိုလွှဲပြောင်းရယူခဲ့သည့် ၂ နှစ်တာကာလအတွင်း မော်ရီစီယို ပိုချက်တီနို ထွက်ခွာသွားပြီးနောက် မာရီစကာကို ၆ ယောက်မြောက် နည်းပြ (ယာယီနည်းပြများအပါအဝင်) အဖြစ် ခန့်အပ်ခဲ့သည်။ လက်စတာစီးတီးအသင်းကို ချန်ပီယံရှစ်ဖလားရရှိပြီး ပရီးမီးယားလိဂ်သို့ တန်းတက်အောင် စွမ်းဆောင်ပေးနိုင်ခဲ့သည့် အီတလီလူမျိုးနည်းပြ မာရီစကာအပေါ် မာကီလီလီက အကောင်းမြင်လျက်ရှိသည်။

မာကီလီလီက "အခု ချယ်လ်ဆီးမှာ အရေးအကြီးဆုံးက တည်ငြိမ်မှုပဲ" ဟု ပြောကြားခဲ့သည်။

"သူ (မာရီစကာ) ဟာ အရည်အချင်းရှိတဲ့ နည်းပြတစ်ယောက်ပါ။ သူက လက်စတာမှာ အောင်မြင်မှုတွေ ရယူပြခဲ့ပြီးပြီ။ ဒါပေမဲ့ ချယ်လ်ဆီးဆိုတာက မတူညီတဲ့အဆင့်တစ်ခုပါ။ သူ့မှာ အသင်းအတွက် အတွေးအခေါ်ကောင်းတွေ ရှိပါလိမ့်မယ်။ ဒါပေမဲ့ သူ့ကို အချိန်ပေးဖို့လိုတယ်။"

ပြင်သစ်ကွင်းလယ်ကစားသမားဟောင်း မာကီလီလီက ကလပ်၏ ထိပ်ပိုင်းခေါင်းဆောင်များသည် အောင်မြင်သော အသင်းတစ်သင်း တည်ဆောက်ရန် မည်သည့်အရာများ လိုအပ်သည်ကို နားလည်ပြီး နည်းပြ၏ အတွေးအခေါ်ကို ယုံကြည်စွာဖြင့် အခိုင်အမာ ထောက်ခံပေးရန် လိုအပ်ကြောင်း အလေးပေးပြောကြားခဲ့သည်။

"အသင်းရဲ့ ထိပ်ပိုင်းလူတွေက အသင်းတည်ဆောက်ဖို့ ဘာတွေလိုအပ်တယ်ဆိုတာကို နားလည်ဖို့လိုပါတယ်။ သူတို့က နည်းပြကို ရွေးချယ်ခန့်အပ်တယ်။ ပြီးရင် နောက်တစ်နှစ်နေတော့ နောက်တစ်ယောက်ပြောင်းတယ်။ နောက်ထပ် အတွေးအခေါ်အသစ်တစ်ခုနဲ့ နောက်ထပ်ကစားသမားသစ်တွေ ထပ်ရောက်လာတယ်။ ဒီလိုပုံစံနဲ့တော့ အောင်မြင်တဲ့အသင်းတစ်သင်းကို တည်ဆောက်လို့မရပါဘူး" ဟု သူက သုံးသပ်ခဲ့သည်။

"ဒါကြောင့် မာရီစကာကို အချိန်ပေးပြီး သူ့ရဲ့အတွေးအခေါ်အတိုင်း အလုပ်လုပ်ခွင့်ပေးဖို့က အရေးကြီးဆုံးပဲ။ ဒီလိုသာလုပ်ပေးနိုင်ရင် ချယ်လ်ဆီးအသင်းရဲ့ အောင်မြင်ခဲ့တဲ့နေ့ရက်တွေ ပြန်ရောက်လာမှာ သေချာပါတယ်" ဟု မာကီလီလီက နိဂုံးချုပ်ပြောကြားခဲ့သည်။